Preeklampsia (para eklampsia) është hipertencion (presion i lartë e gjakut) i shoqëruar me proteinuri (proteinë në urinë) dhe edemë (fryrje të gjymtyrëve edhe të fytyrës), që ndodh kryesisht tek gratë me shtatzëni të parë pas javës së 20-të, më shpesh gjatë tremujorit të tretë të shtatzënisë. Hipertencioni është kriteri më i rëndësishëm për vlerësimin e preeklamsisë.

Preeklampsia mund të paraqitet në dy kategori, e lehtë dhe e rëndë. Preeklampsia e lehtë mund të kalojë në fazë të rëndë, në eklampsi. Në këtë rast, gruaja paraqitet në klinikë me kriza konvulsive.

Shtimi në peshë i më shumë se 1 kg në javë ose shtimi në peshë në mënyrë të papritur për 1-2 ditë, mund të konsiderohet shqetësues.

Preeklampsia mund të shoqërohet me lindje të parakohshme. Gjithashtu preeklapmsia rrit rezikun për zvoglim të rritjes intrauterine dhe paksimin e lëngjeve tek fetusi.

Preeklampsia mund të menaxhohet shumë mirë me trajtim hospitalier (regjim shtrati dhe trajtim në spital). Në faza të lehta menaxhimi i preeklampisë mund të menaxhohet edhe me regjim shtrati në shtëpi, nëse zbatohen rigorozisht këshillat e mjekut.

Gratë shtatzëna duhet të kenë parasysh sinjalet më të rezikshme të kësaj gjendje. Ato janë dhimbja e kokës, dhimbja epigastrike (stomaku) ose shqetësimet vizuale (të shikimit). Këto shenja, së bashku me rritjen e presionit të gjakut dhe me proteinurinë, duhet ta çojnë gruan shtatzënë detyrimisht tek mjeku gjinekolog.

Ju uroj të kaloni shtatzëni normale.