E nderuara Alketa,

Vjen një ditë dhe fëmija shkëputet nga qumështi i gjirit. Kohëzgjatja e ushqimit me gji varet kryesisht nga dy faktorë kryesorë, dëshira e nënës dhe kërkesa e fëmijës. Por gjithmonë, kur vendoset për të ndërprerë ushqimin me qumësht gjiri, ushqimi zëvendësues për fëmijën duhet të fillojë gradualisht se edhe ndërprerja e ushqyerjes me qumësht gjiri, duhet të bëhet gradualisht.

Si mjeke obstetre rekomandoj, që kjo periudhë të fillojë të ndodhë së paku kur fëmija është mbi 6 muaj. Ndonëse shumë studime rekomandojnë, që ushqimi më i mirë që mund të marrë fëmija gjatë vitit të parë të jetës, është qumështi i gjirit. Ushqyerja e fëmijës me gji, ul rreziqet e vdekjes së fëmijëve. Është e vërtetuar se qumështi i gjirit i mbron ato nga disa sëmundje kronike. Studimet gjithashtu tregojnë se kohëzgajtja e dhënies së qumështit të gjirit deri në 2 vjet, ul rreziqet e kancerit të gjirit të gruas në moshën e para menopauzës dhe kancerit të mitrës.

Ndodh si në rastin tuaj, që nënat kanë dëshirë t’i ushqejnë fëmijët e tyre me qumësht gjiri për një kohë të arsyeshme sa më të gjatë të mundshme. Mundet që nuk ja dalin dot, pasi është fëmija që largohet nga ushqimi me gji. Atëherë kujdesi duhet t'i kushtohet zëvendësimit të një vakti me qumësht gjiri, me ushqim artificial (natyrisht me biberon kur fëmija është nën 6-të muaj) dhe periodikisht vazhdohet deri në zëvendësimin e të gjitha vakteve të ushqyerjes me qumësht gjiri.

Pas 5-së javë ndërprerje të ushqyerjes së fëmijës me gji, prania e qumështin nuk është normale. Pavarësisht se nuk ndjeni shtrëngime, temperaturë apo shqetësime të llojeve të tjetra, rekomandoj që të drejtoheni tek mjeku gjinekolog për kontroll dhe konsultë. Në varësi të situatës që do konstatoj, ai do të ndërtojë skemë trajtimi e cila do normalizojë këtë situatë.