E nderuara, Loresa,

Si mjeke obstetre, nuk më vjen mirë kur ndigjoj për gra të cilat nuk kanë mundur të lindin fëmijë. Ka shumë e shumë faktorë, që ndikojnë në këtë problem kaq të mprehtë familjar dhe shoqëror.

Duke u nisur nga ato që ju shkruani, unë them se keni mundwsi për të mbetur shtatzënë. Rastet e raportuara në literaturën botërore, tregojnë se gratë me mitër të vogël kanë mbetur shtatzënë, por shtatzënitë nuk janë çuar deri në fund. Rreziku i abortit tek gratë që paraqesin mitër të vogël (hypoplazi uterine) është 2 herë më i madh se sa tek gratë që kanë mitër normale.

Mitra, është pjesë e traktit riprodhues femëror. Ajo lidhet me qafën e mitrës dhe tubat e Fallopit. Qafa e mitrës është hyrja e spermatozoidëve mitër, ndërsa nga tubat e Fallopit vjen veza e cila në këto tuba fekondohet. Më pas veza e fekonduar vendoset në kavitetin e mitrës, duke zhvilluar shtatzëninë. Kur qafa e mitrës është normale, kur tubat e Fallopit janë të lira si dhe kur plotësohen kushtet e tjera, atëherë shtatzënia mund të ndodh.

Pra, madhësia e mitrës nuk është pengesë për një shtatzëni.