Aurita Agushi është ndër aktoret më të suksesshme për momentin në Kosovë. Ajo ka aktruar në disa filma, kurse aktualisht është pjesë e serisë televizive “Stinë dashurie”. Ajo, njihet si aktore e shquar që në mënyrë të përkryer ia paraqet publikut emocionin. Kësaj radhe do të lexoni intervistë më ndryshe me të. Do të flas për dy vajzat e saj, përkuishtimin ndaj fëmijëve dhe emocionin që ka përjetuar si nënë.
Beba ime: Thonë fëmijët ta ndryshojnë jetën, ndodh kjo në të vëretë në realitet?
Aurita Agushi: A është e vërtetë?! Nuk ka të vërtetë më të madhe, fëmijët jo që ta ndryshojnë jeten, ata janë vetë JETA.
Beba ime: Çka ka ndyshuar në jetën tuaj para dhe pas lindjes së fëmijëve?
Aurita Agushi: Shumë gjëra kanë ndryshuar apo thënë më mirë e gjithë jeta ime ka ndryshuar. P.sh nëse para lindjes së fëmijëve të mi nuk e kam pasur edhe aq shumë të zhvilluar ndjenjën e kohës, e kohë tash edhe një minutë i vetëm është shumë i rëndësishëm.
Beba ime: Por, çfarë ndjesi të jep kur fëmijët të thërrasin nënë?
Aurita Agushi: Nuk ka fjalë që munde ta përshkruaj ndjesinë kur dëgjon të të thërrasin mami. Unë për vete ndjehem sikur edhe mund të fluturoj.
Beba ime: Tani vetë jeni nënë dhe a pajtoheni se me të vëretë gjëja më e shtrenjtë në botë është nëna?
Aurita Agushi: Nuk ka gje më të shenjtë në botë se nëna.
Beba ime: Për ju ka qenë gëzim i dyfishtë sepse ju keni dy vajza binjake. Na flisni pak për to, sa vjeçare janë, si i kanë emrat, etj?
Aurita Agushi: Ohhh ka qenë lajmi më i bukur që kam mundur ta marrë deri atëherë në jetën time. Binjaket e mia tashmë janë 7 vjeçe dhe shkojnë në klasë të dytë. Quhen Glorioza dhe Helianta (emra lulesh), nuk ngjajnë me njëra-tjetrën (nuk janë binjake monozigot), por e plotësojnë aq shumë njëra-tjetrën dhe nuk rrijnë asnjë minutë pa njëra tjetrën. Glorioza është çapkënja e familjes përderisa Helianta do saktësi 100% në çdo gjë që bën. Kur mami qorton njërën gjithmonë aty është tjera për t'i dalë në mbrojtje motrës dhe kjo gjë mua ma mbush zemrën me gëzim.
Beba ime: Mund të na tregoni si jeni ndjerë në momentin e parë që jeni bërë nënë?
Aurita Agushi: Në atë moment do ta kisha ndalë kohën po të mundja që ai çast të zgjaste deri në përjetësi.
Beba ime: Çfarë ndjesi ka qenë kontakti i parë me vajzat, si mund ti përshkruani ato çaste?
Aurita Agushi: Kisha ndjenjën që në çdo sekondë zemra do të ma shponte gjoksin për të dalë jashtë, pastaj është aroma e tyre që ende më duket se e ndjejë, aromë të cilën e kanë vetëm foshnjët e porsalindura. Pasi që i ushqeja dhe i vija në gjumë i shikoja deri sa flinin dhe nuk mund të besoja se ato dy engjuj janë krijesat e mia dhe janë aty me mua duke i dhënë aromë gjithë shtëpisë.
Beba ime: Si mund të na përshkruani momentet e ardhjes së vajzave në shtëpi. Jeni frikësuar se mos nuk do t’ia dilni, kush ju ka ndihmuar në ditët e para?
Aurita Agushi: Po jam frikësuar, sepse ishin shumë të vogla, edhe duke i ledhatura kisha frikë se mos i lëndoja po pastaj vjen një moment kur e mbledhë, kur shikon sytë e tyre kërkues që sikur të thonë unë jam këtu dhe ti duhet të kujdesesh për mua di apo nuk di, pate frikë ose bashkë do t'ia dalim. Po unë jam shumë me fat, sepse kam pasur afër familjen time, në veçanti motren time Shqipen, e cila është si një nënë e dytë për vajzat e mia. Dhe kam qarë shumë herë madje kur jam ndjerë që nuk di të kujdesem si duhet apo nuk po i kuptoj bebat e mia.
Beba ime: Çka do t’ju sugjeroje nënave të reja, apo edhe atye që janë në prag të lindjes?
Aurita Agushi: Për nënat e reja çfarëdo që do t'u sugjeroja nuk do të ishte e mjaftueshme apo këshilla e duhur, sepse çdo njëra e përjeton në mënyrën e saj. Andaj kam vetëm një gjë mos u frikesoni se nuk do t'ia dilni apo që nuk dini, mjafton ti shikoni sytë e foshnjës tuaj, ata do t'ua thonë më së miri. Mos harroni instikti amnor është aty dhe është mrekullia vetë.
Intervistoi: TEUTA SINANAJ