Teuta Kurti njihet si këngëtare me vokal të jashtëzakonshëm, që u bë e njohur nga “Ethet e së premtes”. Ajo është këngëtare që gjithmonë ka sjellë këngë me vlera. Teuta është e martuar dhe nga martesa e saj me Dardanin ka një vajzë që e ka pagëzuar me një emër shumë të veçantë, Aya.
Bebaime: Fillimisht na flisni nga kush përbëhet familja juaj?
Teuta Kurti-Luta: Nga unë, Dardani dhe vajza Aya.
Bebaime: Ju keni një vajze të cilën e keni pagëzuar me emrin Aya. Pse vendoset ta pagëzoni e këtë emër, dhe çfarë kuptimi ka ky emër?
Teuta Kurti-Luta: Aya emrin vendosi Dardani. Është emër internacional me kuptime në shumë gjuhë, por arsyeja e vërtetë është në gjuhën arabe që ka kuptimin e mrekullisë dhe i referohet ajeteve të Kuranit.
Bebaime: Në flisni pak për Aya, nga dita e parë e gjer tani?
Teuta Kurti-Luta: Aya qysh në bark ka qenë fëmijë shumë i gjallë, d.m.th., ka lëvizur tepër, edhe pse unë kam qenë tepër e qetë. Aya edhe kur ka lind, dy ditë në spital nuk ka fjetur fare, siç flenë bebet tjera. Nuk ka qarë, vetëm fillimi si çdo bebe me ngërca po, mirëpo ka dashur ta mbajmë vetëm në dorë të fle me mua, me një fjalë jo shumë fëmijë i rehatuar. Jam e lumtur që është shumë e gjallë, sepse këtu vërehet edhe inteligjenca e saj. Tanimë ajo me datë 18 nëntor bën 16 muaj, vrapon, flet një numër të madhe të fjalëve, jam shumë e kënaqur që gjithashtu është tepër muzikale.
Bebaime: Na tregoni si jeni ndjerë në momentin e parë që keni parë fëmijën tuaj, keni thënë dhe ju si shumë nëna “ashtu siç e kam imagjinuar”?
Teuta Kurti-Luta: Po ndjenjë e veçantë vërtetë, edhe pse sa jam gëzuar edhe jam frikësuar, sepse tanimë ajo ka qenë komplet në përgjegjësin time dhe ishte frika prezent. Mirëpo, unë kam katër mbesa dhe janë rritur në duart e mia, andaj kam qenë e përgatitur.
Bebaime: Çfarë ndjesi ka qenë kontakti i parë me të, si mund të na përshkruani ato çaste?
Teuta Kurti-Luta: Zëri i saj ka qenë ajo cka se harroj kurrë, pastaj kur mjeku e afroj afër në faqet e mia, ishte moment i veçantë, nuk ka ndjenjë që e përshkruan atë bukuri. Jam e bekuar nga Allahu që më ka dhënë mundësinë ta provoj këtë ndjenjë, e shpresoj dhe shumë femra të tjera ta provojnë.
Bebaime: Tani Aya ka mbushur një vit. Sigurisht shkon në kopsht. Na tregoni ditën e parë kur e keni dërguar në kopsht si jeni ndjerë?
Teuta Kurti-Luta: Po Aya ka filluar në kopsht qysh kur i ka pasur nëntë muaj. Vetëm kur kam shkuar të interesohem kam filluar të qaj, mirëpo gradualisht, ku ditën e parë kam ndenjur me Ayan, ditën e dytë vetëm një orë, pra kështu ka qenë më lehtë, edhe për mu dhe për atë.
Bebaime: Sa ju ndihmon bashkëshorti rreth fëmijës?
Teuta Kurti-Luta: Dardani është me punë dhe momentin kur vjen prej punës ai merret me të. Ayes unë i blej lodra, e Dardani libra, ku edhe i lexon, pra është tepër i përkushtuar.
Bebaime: Nënat janë të lidhur emocionalisht me fëmijët e tyre. Ju ka ndodhur ndonjëherë që edhe ju të qani bashkë me vajzën tuaj, në ndonjë rast të caktuar?
Teuta Kurti-Luta: Po kur kishte ngërca, vaksinat dhe ditët e para në kopsht.
Bebaime: Çka do t’ju sugjeroje nënave të reja, apo edhe atyre që janë në prag të lindjes?
Teuta Kurti-Luta: Të jenë të qeta, ti përkushtohen detyrave të mjekut, kontrolleve, të hanë më tepër pemë, perime dhe jo cigare. Sa i përket shtatzënisë nuk mund ta dimë më saktë, sepse vërtet çdo barrë e ka natyrën e vetë, kështu që nëse e ruajnë qetësinë atëherë është më lehtë për to të kalojnë çdo fazë.
Bebaime: Keni menduar në të ardhmen ta zgjeroni familjen edhe me ndonjë fëmijë tjetër?
Teuta Kurti-Luta: Në emër të Zotit po, mirëpo jo njëherë. Tani është koha kur Aya ka më tepër nevojë për ne, për komunikim si dhe tani ajo fillon ti zhvillojë lojërat e ndryshme dhe duhet ti jemi afër.
Bebaime:Tani që jeni bërë nënë si fillon një ditë e juaj?
Teuta Kurti-Luta: Aya deri në muajin e gjashtë, është zgjuar në ora 5 e 30 të mëngjesit, ka qenë pak lodhje, sepse edhe natën nuk e ka bërë gjumin si duhet. Kurse, tani flenë deri në ora 7:00, sepse lodhet duke lozur e vrapuar. Si të zgjohet e veshi, ia bëjë gati çantën për kopsht, ndërkohë Dardani merret me të, deri sa i rregulloj punët e shtëpisë dhe atë e dërgojë në kopsht, kurse unë vazhdoj në punën time.
Bebaime: Na përshkruaj pak se çfarë emocioni ka qene momenti kur keni kuptuar se do të bëheni nënë?
Teuta Kurti-Luta: Emocion dhe frikë të shkoj shtatzënia pa probleme, komplikime dhe që nga fillimi kam vendosur ta lind Ayen me prerje cezariane, vetëm që ajo mos të mundohet. Gjërat kanë shkuar mirë dhe rrobat e bebes kam filluar ti blej tek në muajin e nënëtë, asgjë para kohe.
Bebaime: Sa ka ndryshuar jeta juaj që kur lindi Aya?
Teuta Kurti-Luta: Shumë dhe kuptohet e gjitha për të mirë, tani s’ka më plane (qeshët), e gjitha sillet rreth Ayes.
Bebaime: Si mund ta përkufizoni fjalën “nënë”?
Teuta Kurti-Luta: Nënë është fjala më e ëmbël, më e dashur, më e shtrenjta që ekziston dhe jam e lumtur që Aya ma dha këtë titull.
Bebaime: Cila është këshilla juaj për nënat dhe gratë që janë shtatzëna?
Teuta Kurti-Luta: Të kontrollohen rregullisht te mjeku, ti përmbahen këshillave mos të lexojnë shumë, me qëllim që të mos preokupohen me ngjarje të ndryshme, thjesht të kujdesen nga ushqimi, jo cigare dhe jo alkool.
Intervistoi: TEUTA SINANAJ