Para se të vendosni që të shkoni për kontrollim gjinekologjik, duhet kushtuar rëndësi disa gjërave, që në shikim të parë duken të parëndësishme.

Sipas mjekëve, veprime të caktuara para se të vizitoheni te gjinekologu mund të ndikojnë në ndryshimin e rezultateve të Papa-testit, por edhe të kontrollimeve të rëndomta. Sipas tyre, është mirë që kontrollimi mjekësor të bëhet disa ditë para ose dy javë pas mujoreve (menstruacioneve), nëse nuk ju ka këshilluar ndryshe mjeku juaj.

Ja çfarë nuk është e këshillueshme të bëni para vizitës te gjinekologu.

Shpëlarje intensive e pjesëve intime, sidomos dushi.

Pse? Në këtë mënyrë mund të shpëlahen edhe bakteret, të cilat mund të jenë tregues të infektimit ose të karcinomit, të cilat do të mund të zbulonte testi Papa.

Sa duhet të jetë kohëzgjatja? Së paku 3 ditë para kontrollimit. Shumë gjinekologë kundërshtojnë larjen intensive të këtyre pjesëve te trupit, sepse kështu shpëlahen edhe bakteret e shëndosha “të dobishme”, ato që parandalojnë infeksionin.

Seksi pa përdorim të kondomit.

Pse? Sperma mund të turbullojë rezultatin e strishos.

Sa duhet të jetë kohëzgjatja? Së paku një ditë para kontrollit.

Përdorimi i barnave për aplikim vaginal, lubrifikanteve ose kremrave spermicide

Pse? Sepse mund të ndikojë në pasaktësinë e rezultatit të testit papa, por edhe te kontrollimet e rëndomta.

Sa duhet të jetë kohëzgjatja? Tri ditë para kontrollimit 06/2014