Përshëndetje Nora.

Përse ky shqetësim i madh. Mesa po kuptoj tek ty çdo gjë është duke ecur normalisht. Kjo do të thotë se mundësia më e madhe është të lindësh në javën e 40.

Nora, ti do ta kuptosh, kur do jetë koha për lindje. Aktiviteti i lindjes shoqërohet me tre shenja kryesore. Shenja e parë; është shkëputja e tapës mukoide. Kjo shkëputje mund të ndodhë si shenjë e parë e lindjes ose pas shenjave të tjerë të lindjes. Shenja e dytë; është plasja e ujrave. Rrjedhja e tyre mund të jetë e vrullshme ose në sasi të vogël. Edhe pse mund të mos kesh dhëmbje, duhet të shtrohesh në shtëpinë e lindjes. Shenja e tretë; janë kontraksionet (dhëmbjet e lindjes) që paraqiten çdo 20-30 minuta. Janë dhëmbje fillimisht të lehta dhe më vonë bëhen të shpeshta dhe ritmike. Kohëzgjatja është nga disa sekonda deri në 50 sekonda. Normale konsiderohet, periudha deri 20 orë tek gratë që kanë lindjen e parë dhe deri 14 orë për gratë që kanë kryer një ose më shumë lindje.

Nora, duhet të kesh parasysh që gjatë periudhës së kontraksioneve të kryhesh ecje dhe lëvizje të lehta në periudhën midis dy lindjeve. Mund të qëndrosh ulur ose shtrirë, të urinosh sa më shpesh të jetë e mundur. Midis dy kontraksioneve të kesh një frymëmarrje sa më të thellë, ndërsa gjatë kontraksionit frymëmarrja të jetë sa më e lehtë.

Shenjat që tregojnë përparimin e proçesit të lindjes, fillojnë të shfaqen në javën e 40-të të shtatzënisë. Pranohet si lindje në kohë, edhe lindja pas javës së 37-të të shtatzënisë.

Uroj të lindësh një fëmijë të bukur.