Klamidia është infeksion bakterial, që transmetohet me rrugë seksuale dhe ka mundësi të trasmetohet edhe nga kontakte me objekte të ndryshme. Qafa e mitrës, urtera, rektumi dhe thithkat e gjinjëve janë organet kryesore të infektimit nga klamidia. Bakteri i klamidias është konstatuar edhe në fyt, mëlçi dhe mushkëri.

Gratë e infektuara nga klamidia, në të shumtën e rasteve janë asimptomatike. Tek gratë simptomatike, ato shfaqen deri në 3 javë pas infektimit. Disa nga shenjat e pranisë së klamidias janë; shtimi i sekrecioneve vaginale, urinim i shpeshtë i shoqëruar me dhëmbje, dhëmbje në fund të barkut, dhëmbje gjatë akteve seksuale, anomali kohore menstruale, infeksion në sy që shfaqet me enjtje, irritim dhe dhëmbje.

Trajtimi medikamentoz për klamidia, është antibiotiku. Por suksesi i mjekimit varet edhe nga trajtimi me antibiotik edhe i partnerit. Gjatë periudhës së mjekimit, nuk duhet të kryeni marrëdhënie seksuale. Pasi të jesh rikonsultuar me mjekun, dhe kur ai konstaton se mjekimi i klamidias është arritur, mund të vazhdohet jeta normale.

Mimoza, po mundohem të të them se shqetësimi yt nuk duhet të përqëndrohet tek shkaku i marrjes së infeksionit e as tek simptomat e tij. Është e referuar se infeksioni gjenital i klamidias është faktor për infertilitetin femëror. Mjekimi është kryesori, aty përqëndrohu, përqëndrohu tek mjekimi rigoroz, bashkëkohor, i përshtatshëm dhe i plotë për të dy partnerët, mos harro për të dy. Vetëm kështu ekziston mundësia, që shtatzënia të shkojë deri në fund të saj. Nëse klamidia është e pranishme gjatë shtatzënisë, mjekohet pa shkaktuar probleme anësore.

Shpresoj dhe uroj të vazhdosh jetë normale.