Përshëndetje çiftit.

Me një frymë dhe shumë emocion, keni përshkruar dëshirën tuaj për fëmijën e parë. Shtatzënia e parë, është periudha më emocionale dhe shumë e bukur e jetës së çiftit.

Ju duhet ta dini, se mos ardhja e menstruacioneve në ditën që gruaja pret ardhjen e ciklit menstrual, të çon në mendimin për fillimin e një shtatzënie. Por, mosardhja e menstruacioneve nuk është gjithmonë shenjë e sigurtë për fillimin e shtatzënisë.

Edhe zmadhimi dhe tendosja e gjirit, duke qënë pak i dhëmbshëm në prekje dhe errësimi i areolës për rreth thithkave, është një shenjë e fillimit të shtatzënisë. Por, edhe kjo shenjë nuk është e sigurtë.

Shtimi i sekrecioneve vaginale, është një shenjë tjetër që mund të tregoj fillimin e shtatzënisë. Por, edhe kjo shenjë nuk jep siguri për atë që pritet.

Shija jo normale e gojës, ndjenja e të vjellit apo ndjenja e neverisë kundrejt disa ushqimeve, mbeten një nga shenjat për fillimin e shtatzënisë. Por, edhe këto shenja nuk japin siguri për atë që mendohet.

Kombinimi i këtyre shenjave mund të tregoj për fillimin e shtatzënisë. Megjithatë, analiza më e thjeshtë për të treguar shtatzëninë është ajo e urinës. Të qënit shtatzënë, bën që në qarkullim të shtohet niveli i gonadotropinave korionike, hormone që gjënden edhe në urinë. Gjetja e këtij hormoni, është një shenja me shkallë të lartë sigurie për të treguar fillimin e shtatzënisë. Ky test bëhet me urinën e mëngjezit ose në serumin e gjakut. Por për arsye të ndryshme ndodh që edhe këto teste, mund të japë rezultat të gabuar.

Ju, çifti i friguar nuk duhet të jeni absolutisht i tillë. Unë shpresoj, që ju keni nisur fëmijën tuaj të parë. Por me qetësi, duhet të prisni përgjigjen përfundimtare në klinikat e specializuara.

Do dëshiroja të isha pranë jush, kur të merrni përgjigje pozitive.