Përshëndetje Dorina

Urthi që shumë gra e perceptojnë si djegje ose dhimbje stomaku, vjen si pasojë e shtypjes së stomakut nga mitra shtatzënë.

Ai shfaqet në rreth 50% të grave shtatzëna dhe shtohet me rritjen e moshës së shtatzënisë, kur edhe volumi i mitrës rritet. Dhimbjet janë më të shpeshta gjatë natës, kur je shtrirë dhe gjatë ditës kur përkulesh përpara.

Këshilla më e mirë në këtë rast është që të hash shpesh dhe sasi të vogla ushqimi, të shtosh në dietë qumësh dhe të pish ujë gjatë ngrënies, sepse uji ul aciditetin e stomakut. Nuk këshillohen ushqime të thata dhe pikante dhe duhet të pakësosh lëngjet e agrumeve (portokalle/limona), salcat e ndryshme, lëngun e domates dhe të mos pish duhan.

Këshillohet gjithashtu të përdorësh jastëk pak të lartë për të fjetur.

Të uroj shtatzëni të mbarë.