E nderuara Nita,

Pyetja juaj e shkruajtur tepër profesionalisht, më ngjalli respekt. Ndaj do t’ju përgjigjem me dijet e shkencës mjeksore, në mënyrë të përmbledhur dhe të qartë, që ju ta kuptoni edhe më mirë problemin tuaj.

Shtatzënia mund të shkaktojë ndryshime të oreksit dhe një gjendje të përgjithshme jo të mire, që mund të shoqërojë atë nga fillimi deri në fund, në varësi të shumë faktorëve. Koha mesatare e zbrazjes (tretjes së ushqimit) së stomakut zgjatet. Reduktimi i tonusit dhe motilitetit të stomakut ka rol jo të vogël në të gjitha ç’rregullimet gastrointestinale. Ju duhet të dini gjithashtu se të vjellat që ankoni, mund t’ju vijnë jo vetëm si rezultat i shtatzënisë por, shtohen edhe nga prania e gurit në tëmth.

Funksioni hepatik, nuk pëson ndryshime të theksuara në shtatzëni. Guri në tëmth, është rastësi në periudhën e shtatzënisë.

Krizat që shfaqen herë pas here, kanë influencë jo të mirë në shtatzëni. Ndaj ato duhen menaxhuar. Dehidratimi nuk është nomal, pasi fetusi kërkon që nëna të marrë sasi të nevojshme likidesh. Ballancimin e likideve, duhet t’jua rekomandojë mjeku i cili ju ndjek shtatzëninë.

Preparati që përdorni, ka efekt spazmolitik mbi muskulaturën e lëmuar të aparatit tretës dhe rrugëve biliare. Nuk ka veprim qetësues qëndror, dhe përdorimi i tij është i mundur të bëhet edhe tek gratë shtatzëna. Ballancën e përparësive midis efektit pozitiv dhe efekteve anësore e përcakton mjeku që ju ndjek. Kjo praktikë zhvillohet edhe në SUOGJ “Koço Gliozheni”, Tiranë. Megjithatë, terapia për të cilin po flasim, nuk është e detyrueshme për tu zbatuar nga çdo mjek.

Për të hequr ankthin që keni krijuar nga leximet tuaja, drejtohuni miqësisht tek mjeku për të riparë bashkërisht (ti dhe ai) mundësinë e marrjes të një spazmolitiku tjetër. Ju keni të drejtë ta bëni këtë hap. Të jeni e sigurtë se mjeku do t’ju mirëkuptojë, duke të ofruar medikamentin më të pranueshëm për situatën tuaj.

Sinqerisht Nita, ju uroj të kaloni një shtatzëni të mbarë.