10.09.2019 - Fëmijët po përgatiten për vitin e ri shkollor, dhe emocionet janë të pashmangshme.

“Gjithë problemi i edukimit është të shmangim frikën, ne vazhdojmë të edukojmë përmes frikës dhe ky është problem madhor. Bota e lufton, sepse frika mbyt e vret aftësinë e të mësuarit”- tha Lira Gjika, pediatre.

Ne mendojmë, se e mësuara është të lexosh e të jesh në gjendje ta riprodhosh materilain.

“Jo nuk është kjo. Siç thotë edhe një nga psikologët më të njohura dhe filozove njëkohësisht, dy paradokse ka njeriu aftësinë për të dashur dhe për të mësuar. Ajo që i shkatërron këto dy paradokse është frika”- vijoi pediatra.

Pediatrja këmbëngul që të njohim mirë potencialin e fëmijëve tanë dhe të shmangim autoritetin përmes frikës.

“Ne duhet të rregullojmë veten si fillim. Aftësia e fëmijës për të mësuar, për të qënë vetja, për t’u bërë dikush, është në dorën e të rriturit. Nuk mjafton të duash, duhet të dish të duash. Gjyshërit ndikojnë gjithashtu negativisht” tha Gjika.

Prindi dhe mësuesi janë nxitësi dhe modeli. Ata janë aty që fëmija t’ja dalë.

“Kjo punë bëhet hap pas hapi, me shumë kujdes, jo duke parë ato që fëmija nuk di të bëjë, por arritjet e tij dhe arritjet e fëmijës janë shumë të vogla. Ne duhet të fitojmë aftësinë t’i dallojmë këto arritje”- u shpreh Gjika.

Pediatrja bën thirrje për një punë serioze nga institucionet shtetërore me fëmijën.

“0 deri në 2 vjeç, me trurin e fëmijës mund të bëhen mrekulli. Mund të shmangësh deri sëmundje të rënda. Ne këtë periudhe e kalojmë a hëngri, a fjeti gjumë”- tha pediatrja.

Mjekja këmbëngul në ndërtimin e një modeli për vendin tonë. Ajo nënvizon edhe shembujt negativë që përccohen përmes medias.

“Kur shikojmë njerëz që janë shkolluar jashtë dhe shahen, që kanë marrë fatet e vendit në dorë, më fal, por çfarë modeli japim” theksoi Gjika.

Pediatrja ka nje mesazh për mësuesit.

“Mos të bërtasin. Mësuesit janë sa fajtorë dhe viktima. Një mësues në një ambient 4 me 5, po pati 18 nxënës i degjon ata, po pati më shumë dëgjon zhurmë”- u shpreh mjekja.

Çdo njeri duhet të mësojë të mbajë përgjegjësi për fjalët e tij. Madje pediatrja ndalet tek be-të që bëjmë në jetën e përditshme.

“Po nuk u morëm me shkollimin, ne do të vazhdojmë të mbetemi siç jemi, ja kështu njerëz që shajmë shumë, njerëz që betohen për kokën e fëmijës. Një njeri i përgjegjshëm nuk bën be për kokën e fëmijës, ai duhet të betohet për fjalën e tij”- përfundoi Lira Gjika.

Burimi: Top Channel