26.03.2012 - Një fenomen i pazakonshëm ka ngjarë të hënën para Komunës së Prishtinës. Një fëmijë njëvjeçar, O.H. ka qëndruar rreth dy orë para Komunës së Prishtinës, ngase prindërit e tij e kishin harruar atë.
Siç ka mësuar gazeta, prindërit të shoqëruar edhe nga motra e nënës së fëmijës kishin shkuar në Komunë për kompletimin e disa dokumenteve.
Babai A.H. (30) kishte mbetur duke e ruajtur fëmijën teksa ka hyrë në komunë për t’u konsultuar me bashkëshorten. Ai ka lëshuar objektin e komunës duke llogaritur që fëmijën do ta merrte e ëma S. L.(23).
Edhe kjo e fundit bashkë me motrën kanë lëshuar objektin, duke menduar se atë bashkë me karrocën që gjendej e ka marrë babai.
Kur janë ritakuar në shtëpi, mësohet se ata e kanë kuptuar se e kanë harruar fëmijën e ndërkohë sigurimi i Komunës e ka njoftuar policinë, e cila e ka bërë dorëzimin e fëmijës te prindërit, pasi ata me dokumente kanë dëshmuar se fëmija është i tyre. Nëna e fëmijës është parë duke qarë./zeri/