03.10.2013 - Ndonëse kishte pritur nëntë muaj të lindë beben e saj të gjinisë mashkull, gruaja nga Lipjani këtë fundjavë ka përjetuar ankth të vërtetë gjatë lindjes së bebes në Klinikën e Gjinekologjisë. Edhe pse motra e pacientes punon pikërisht në Klinikën e Gjinekologjisë, të dielën rasti i pacientes G. Tasholli është komplikuar.
E gjitha, sipas burimeve të gazetës “Tribuna”, kishte filluar kur anesteziologu Muharrem Morina dhe dy gjinekologët Heroid Arifi dhe Jasmina Tolaj, ishin marrë vesh që të fillohej me anestezion dhe pas kësaj pacientja të operohej. Por, ndonëse i ishte dhënë anestezioni, mjekët Heroid Arifi dhe Jasmina Tolaj, siç njoftojnë burimet e gazetës, ishin ‘zhdukur’ diku.
Pacientja kishte mbetur mbi dy orë në sallë të operacionit me anestezion spinal, duke pritur mjekët, derisa në Klinikë të dielën ishte detyruar të vinte nga shtëpia drejtoresha e klinikës Myrvete Paçarada, e cila ka reaguar pasi ka parë pacienten duke pritur me anestezion.
Paçarada, siç mëson gazeta, është telefonuar nga një këshilltar i kabinetit të ministrit Ferid Agani se stafi mjekësor kanë lënë për dy orë rresht një paciente me anestezion në sallë dhe nuk po intervenonin./Tribuna/
