Reperi i njohur Luan Mahmutaj, i njohur si Loco para një viti është bërë baba. Ai ka vite që është në skenën e muzikës shqiptare, ku ka sjellë disa hite të ndryshme. Së shpejti publikut do ti sjellë edhe disa këngë të reja, të cilat do të jenë befasi e këndshmë për publikun. Ai në këtë intervistë flet për familjen e tij, për djalin Ennasin dhe shumë gjëra të tjera.
Bebaime: Të gjithë ju njohin si reper i njohur, por pak dinë për familjen tuaj. Në tregoni me disa fjalë për familjen tuaj?
Loco: Edhe ne jemi si gjithë familjet tjera dhe nuk dallojmë shumë prej tyre. Bëjmë jetë të zakonshme, pavarësisht famës që kemi, sepse e rëndësishme është që të jem modest në jetë dhe ta japim më të mirën për familjen, që për mua është gjëja më e shenjtë në këtë botë.
Bebaime: Sa fëmijë i keni. Si quhet fëmija dhe çfarë kuptimi ka emri?
Loco: Kam një djalë, i cili sapo ka mbushur 1 vit dhe quhet Ennas që po të përkthehet bukfalisht i bie të përkthehet si njerëzim, por ka edhe kuptimin tjeter me vlerë të veçantë, pasi që En nas është edhe surja e fundit e librit të shenjtë, Kur’anit.
Bebaime: Na tregoni çfarë gëzimi pati në jetën tuaj kur për herë të parë u bëtë baba. Si ishte ai moment?
Loco: Ishte ndjenjë e pa përshkrueshme, të cilën mund ta shpjegojnë vetëm ata që janë prindër. Diçka shumë e mrekullueshme që s’ka fjalë për ta përshkruar. Pa dyshim se momenti më emocionues është kur e kap në duar për herë të parë dhe e kupton peshën e të qenit prind.
Bebaime: Duket se jeni baba i përkushtuar. Çka ju bën që të jeni kaq shumë i dhënë pas djalit tuaj?
Loco: Si çdo baba tjetër në botë edhe unë mundohem të bëjë më të mirën për djalin tim dhe thjesht bëjë atë që duhet bërë, i fal tërë dashurinë që kam.
Bebaime: Me kë është i lidhur më shumë djali, me ju apo bashkëshorten tuaj?
Loco: Me të dy, por një nuancë më mua (qeshët).
Bebaime: Sa i ndihmoni bashkëshortes rreth djalit?
Loco: Mendoj që i ndihmoj mjaftueshëm. Nuk jam nga ata njerëz që mendojnë që vetëm nëna duhet të kujdeset për fëmijët. Unë i ndihmoj aq sa duhet dhe sa ka nevojë bashkëshortja, mendoj se kur të dy kujdesemi paralelisht, atëherë djali rritet ashtu si duhet.
Bebaime: Na flisni pak për djalin. Ju ka ngjarë juve apo bashkëshortes?
Loco: Djali ka një karakter të fortë. Edhe pse tash është 1 vjeçar, ai shpreh dëshirat e veta, është kokëfort dhe ka dëshirë që vetëm atë që do ai ti realizohet, në këtë pikë më ka ngjarë mua.
Bebaime: I gatuani ndonjëherë djalit dhe nëse po çka konkretisht?
Loco: Ka raste kur e ushqej, mirëpo gruaja kujdeset për përgatitjen e ushqimit. Atë që bëjë në shumë raste është që ushqimin e përgatitur t’ia jap për ta ngrënë.
Bebaime: Cili është mesazhi juaj për prindërit e Kosovës. Si duhet ata ti ushqejnë, edukojnë fëmijët e tyre?
Loco: Mesazhi im kishte me qenë që prindërit të kujdesen sa më shumë për fëmijët e tyre, sepse ata janë e ardhmja jonë. Sa i përket ushqimit do të doja t’u bëjë thirrje të gjithë prindërit që fëmijët e tyre t’i ushqejnë në mënyrë të shëndetshëm, t’u kushtojnë më shumë vëmendje asaj se çka ha fëmija i tyre. Sot ka shumë ushqime të konservuara në treg, dhe e mira do të ishte që fëmijëve, sidomos fëmijëve deri në moshën 1 vjet t’u përgatitin vetë ushqime dhe lëngje, kjo do të ishte ushqyerja më e mirë dhe natyrisht fëmijët do të rriten më të shëndetshëm.
Bebaime: Keni në plan në të ardhmen ta zgjeroni edhe më shumë familjen tuaj?
Loco: E ardhmja është diçka që nuk i dihet. Unë për vete nuk jap tip që planifikoj shumë, sepse kam dëshirë që gjërat të vinë në mënyrë spontane, ku i dihet ndoshta po.
Intervistoi: TEUTA SINANAJ