Bebaime kësaj radhe ju sjellë intervistën e bashkëshortes të aktorit dhe skenaristit të njohur Astrit Kabashit, Shpresa Krasniqi, e cila flet për familjen e saj. Si u njohën me Astritin? Si është të jesh e martuar me njeri të famshëm? A e kanë në plan që ta zgjerojnë familjen? Këto e shumë gjëra të tjera do ti mësoni në intervistën në vijim.

Bebaime: Fillimisht na thoni disa fjalë për familjen tuaj?

Shpresa Krasniqi: Familjen tonë e përbëjnë katër anëtarë unë, Astriti edhe dy fëmijët tanë, Leka dhe Amelia që definitivisht janë lumturia e familjes. Leka është fëmija më i madh, është 9 vjeçar, ndërsa Amelia është ëmbëlsira e familjes dhe është 4 vjeçare. Leka është nxënës i klasës së 4-të, ndërsa Amelia shkon në kopësht.

Bebaime: Ju jeni e martuar me aktorin dhe skenaristin e mirënjohur Astrit Kabashin. Mund të na flisni si jeni njohur dhe që sa kohë jeni martuar?

Shpresa Krasniqi: Jemi njohur në fund të vitit 1999, unë isha nxënëse, kurse Astriti ishte më i pjekur në moshë dhe më bëri për vete shumë shpejt, d.m.th njihemi që 15 vjet, kurse të martuar jemi që 10 vjet.

Bebaime: Si është të jesh e martuar me një njeri që ka famë dhe tërë kohën është i angazhuar, siç është Astriti?

Shpresa Krasniqi: Nuk është edhe e lehtë, duke marr parasysh angazhimeve që ka Astriti, mirëpo mundohet që ti mbuloj mungesen gjatë javës me vikendet e këndshme që i organizon për ne.

Bebaime: Të rikthehemi te fëmijët. Edhe pse ka kaluar një kohë nga sjellja në jetë e fëmijës së parë, megjithatë mund ti ndani disa kujtime për lexuesit e portalit tonë. Si mund ta përshkruani kohën kur u bëtë nënë për herë të parë. Çfarë emocioni keni përjetuar?

Shpresa Krasniqi: Kjo është pjesa që me kënaqësi e flas. Ardhja e Lekës në botën tonë ishte kënaqësi që vështirë të përshkruhet me fjalë. Ishte ndjesia me e fuqishme që kam pasur në jetë. Leka ishte një bebe plotë energji, por 24 orët ishin të rezervuara vetëm për të me kënaqësi merresha. Kishte shumë nevojë për mua, por Astritin gjithmonë e kishte më për zemër (qeshët), mendoj që edhe tani mbetet pjesa më e mirë e jetës. Ishte dhe është fëmijë i shëndosh, çapkën dhe mjaft tërheqës.

Bebaime: Zakonisht nënat thonë se me fëmijën e parë e kanë pasur më vëshirë, vlen edhe për ju kjo?

Shpresa Krasniqi: Ndoshta për shkak të përvojës, pastaj me fëmijën e dytë ndjesheh më e përgatitur, por mendoj që për një nuancë fëmija i parë e ka vëmendjen dhe perkushtimin më të madh.

Bebaime: Kujtoni ndonjë moment nga fëmirija e fëmijëve tuaj që ju ka lënë më shumë përshtyje?

Shpresa Krasniqi: Ka shumë momente, gati çdo ditë më bëjnë të ndihem nënë e veçantë dhe shumë e lumtur, po mund të them që hapat e parë, fjalët e parë, regjistrimi në klasën e parë do ti kujtoj gjithmonë.

Bebaime: Sa ju ka ndihmuar bashkëshorti në rritjen e fëmijëve?

Shpresa Krasniqi: Është munduar shumë. Të them të drejtën, edhe pse vërtetë është shumë i angazhuar, është munduar që të mos na mungoj asnjëherë asgjë dhe ia ka dal shumë mirë, por edhe kohën kur është në shtëpi na kushton kohën e vetë neve.

Bebaime: Ju përgatit ndonjëherë ndonjë ushqim Astriti fëmijëve, kur ju nuk jeni në shtëpi dhe çka përgatit ai më mirë?

Shpresa Krasniqi: (Qeshët), po pica në Proper, ndoshta vezë, sepse omletin e përgatit mirë.

Bebaime: Me kë janë më të lidhur fëmijët me ju apo bashkëshortin tuaj?

Shpresa Krasniqi: Me babin, ndoshta që me mua janë gjatë gjithë ditës, kurse babin e kanë më të preferuar, sidomos vajza Amelia e ka idol babin.

Bebaime: Ngaqë portali ynë lexohet nga gratë shtatzëna dhe nënat e reja keni ndonjë këshillë për to?

Shpresa Krasniqi: I këshilloj të gjitha nënat që të kenë durimin e botës ti rrisin fëmijët me buzëqeshje, ngase fëmijët rriten shumë shpejt dhe janë kënaqësia jonë. Pa ta ne s’do të identifikohemi me emrin më të mirë në botë NËNË.

Bebaime: Keni në plan ta zgjeroni edhe më shumë familjen tuaj?

Shpresa Krasniqi: Nuk i dihet asgjë nuk është përfundimtare. Jemi të ri ende (qeshët), ndoshta kurrë si dihet.

INTERVISTOI: TEUTA SINANAJ