Edona Podvorica është moderatore dhe gazetare në televizionin kombëtar RTV 21. Ajo në këtë televizon është duke punuar prej disa vitesh. Në intervistën e dhënë portalit bebaime.com Edona shpalos detaje nga jeta e saj private dhe të qenurit nënë.

Bebaime.com: Edona Podvoricën publiku e njeh më shumë nga ekrani i RTV 21, si moderatore. Mund të na flisni disa fjalë që sa vjet jeni pjesë e RTV 21 dhe përpos moderimit të “Bon Bon”, moderoni dhe ndonjë emision tjetër?

Edona Podvorica: Përvojën time të parë në gazetari e kam nisur në Rtv21, në moshën 18 vjeçare. Pastaj pas një pauze, unë u bëra pjesë aktive e Rtv 21. Tashmë po bëhen 8 vjet prej kur unë punoj si gazetare dhe prezantuese. Unë në 4 vitet e fundit jam gazetare dhe prezantuese e emisionit të pasditës “Bon-Bon”, ndërsa vitet e para kam udhëhequr edhe programin e mëngjesit. Puna në televizion të bën për vete, mishërohesh aq shumë saqë s’mund të ndahesh më.

Bebaime.com: Pak dimë për jetën private të Edonës. Mund të na flisni disa fjalë se kush është Edona në jetën private. Është e martuar, ku jeton etj?

Edona Podvorica: Unë jam martuar në moshën 22 vjeçare. Në fillim e kisha përshtypjen që u martova shumë e re, ende isha në studime dhe në kohën kur po punoja shumë për t’u ngritur në karrierë. Megjithatë, me angazhimin tim maksimal, përkrahjen e madhe të bashkëshortit, dy familjeve tona, sigurisht që ia kam dalë t’i bëj të gjitha gjërat që kam dashur, ani pse puna si gazetare dhe prezantuese ndonjëherë është pa orar dhe puna nuk dihet kur përfundon.

Bebaime.com: Ju keni një djalë dhe familja për të qenë e kompetuar është fëmija që e bën të tillë. Na thoni disa fjalë për djalin. Çfarë moshe ka, shkon në kopsht apo shkollë?

Edona Podvorica: Anikun e kam lindur vetëm një vit pasi jam martuar. Sapo u bëra 23 vjeçare erdhi ne jetë Aniku. Në fillim kisha ndjenja shumë të përziera, bëja panik rreth kujdesit, kisha mungesë vetëbesimi se do t’ia dalë në detyrën timë te re si nënë, megjithatë kjo gjë me kohën ka ndryshuar dhe sot me gjithë vështirësitë mendoj se epiteti “nënë”, është epiteti më i lartë që mund të gëzojë një femër. Aniku shkon në çerdhën “Edina”, dhe jam shumë e lumtur që aty ka zënë shumë miq të rinj dhe ka një kujdes të madh. Aniku i ka ngjarë babait, dhe për këtë ndonjëherë xhelozoj, por shpresoj t’a kemi edhe një vajzë dhe ajo të më ngjajë mua.

Bebaime.com: E kujt ka qenë ideja për ta pagëzuar me këtë emër djalin? Ju jeni bërë nënë në një moshë të re. Na tregoni a ka qenë kjo për ju sfidë?

Edona Podvorica: Emrin Anik, ia ka vënë bashkëshorti. Që në fillim jemi marrë vesh që nëse lindi vajzë emrin i’a vë unë, dhe, nëse është djalë, për emër do të vendoste ai. Dhe, kështu u bë që ai u përcaktua për emrin Anik. Tani, ky është emri më i mirë në botë për mua. Shpesh e dëgjoj në rrugët e qytetit teksa nënat i thërrasin në këtë emër djemtë e tyre, dhe sikur mbushëm frymë sa herë e dëgjoj. Një nënë e rë, bashkëshorte, studente dhe gazetare pa përmendur edhe sa punët të tjera që bëjmë ne gratë. Ka qenë jashtëzakonisht sfiduese, por sado që ka pasur stres, një pjesë e ditës ka qenë përqafim, dashuri me Anikun.

Bebaime.com: Si ka qenë momenti kur për herë të parë keni mbajtur djalin në duar?

Edona Podvorica: Shtatzënia me ka ecur shumë mbarë. Sot kam nostalgji për ditet kur lexoja me orë të tëra këshilla në portalin për bebe dhe nënat www.bebaime.com. Bile, kam lexuar edhe për procesin e lindjes, si rrjedhë gjithçka dhe ndoshta edhe për shkak të dëshirës që sa me shpejt t’a marr Anikun në dorë, më të vërtet çdo gjë e kam harruar. Ka qenë, moment me ndjenja të përziera, edhe për faktin që po bëhesha nënë për herë të parë.

Bebaime.com: Kush u ka ndihmuar në fillim për të mësuar më shumë rreth rritjes së fëmijëve?

Edona Podvorica: Këshillat më të mëdha i kam marr nga dy gjyshet e Anikut. Ato me kanë ndihmuar shumë rredh gjithçkaje. Sigurisht edhe pjesa tjetër e familjes kanë qenë aty sa herë unë kam pasur nevojë. Por, duke jetuar me një foshnje të vogel nën të njëjtin kulm, njeriu po mësoke çdo ditë diçka të re. Portali bebaime.com dritare e informimit për çdo nënë!

Bebaime.com: Ku keni marrë apo lexuar informata për shtatzani dhe po ashtu këshilla për fëmijët?

Edona Podvorica: Tani jetojmë në një përiudhë kur internet është çdo kund, dhe aty po që gjen cdo gjë. Por, portali “Bebaime”, ka qenë dritarja ku unë kam gjetur gjithçka sa i përket mbarëvajtjes së shtatëzënisë, por edhe rritjes së vogëlushit tim.

Bebaime.com: Meqë jeni e re dhe sot çiftet planifikojnë familjen, ju keni menduar që në të ardhmen ta zgjeroni edhe më shumë familjen tuaj?

Edona Podvorica: Po, për qejfin tim dua ti kem edhe dy fëmijë, mundësisht vajza (qeshët). Një vajzë ka nevojë gjithmonë për një motër, prandaj shpresoj t’i kem dy vajza. Mendoj që familja me tre fëmijë është ideale.

Bebaime.com: Cili është mesazhi juaj për nënat e reja?

Edona Podvorica: Mos u ndieni asnjëherë të lodhura, mos mendoni që vogëlushet e kanë ngushtuar aktivitetin tuaj dhe ju kanë lënë mbrapa me disa punë të tjera, sado që në shikim të parë mund t’ju duket kështu. Nëna ime thotë “fëmijet rritën sa hapë e mbyllë sytë”, prandaj të mundohemi ta shijojmë cdo sekondë me dashuri.

Intervistoi: Teuta SINANAJ