Shkurte Ajeti-Musa ka qenë ndër modelet më të kërkuara në Kosovë, por ajo më nuk e bën këtë punë. Prej kohësh ka vendosur që të krijojë familjen e saj dhe për këtë arsyje është martuar me njeriun që e ka në zemër, ku edhe kanë djalin e tyre, tashmë trevjeçar Miranin. Në këtë intervistë, Shkurte Ajeti-Musa flet për rëndësinë e të qenit nënë dhe po ashtu edhe për modelizmi, të cilit thotë se nuk do ti kthehet më.

Bebaime: Të gjithë e njohim Shkurte Ajeti si modele, por që disa kohë ju jeni e martuar dhe keni ndryshuar mbiemrin në Musa. A vazhdoni ende të jeni pjesë e modelizimit kosovar, pra të merrni pjesë nëpër sfilata apo evente të ndonjë prezantimi kreacionesh?

Shkurte Ajeti-Musa: Qysh para martesës kisha dyshime rreth modelizmit si profesion. Edhe pse mund të them se ende e kam pasion, qysh atëhëre pata vendosur të fokusohem në krijimin e familjes dhe ta lë modelizmin si profesion e të merrem me të më shumë vetem si hobi. Tash, i vizitoj sfilatat e kreatoreve dhe kreatorëve tonë me shumë kënaqësi, por nuk marrë pjese në to. Nuk do të thotë që në ndonjë rast në të ardhmen nëse me të vërtëtë do të ishte ndonjë projekt interesant nuk do të merrja pjesë. Njëkohësisht vazhdoj kohë pas kohe të marr pjesë edhe në foto sesione, mirëpo t’ju them të drejtën fotot sesionet më të dashura për mua janë ato që i bëj me familjen time.

Bebaime: Mbase deri tani nuk e keni folur për ndonjë medium për familjen tuaj. Na tregoni me disa fjalë rreth familjes tuaj.

Shkurte Ajeti-Musa: Nuk kam folur për familjen ngase mendoj se privatësia e familjes është e shenjtë dhe duhet të mbetet e tillë.

Bebaime: Ju nga martesa keni një djalë. Na tregoni disa fjalë për të. Si quhet, sa vjeçar është etj?

Shkurte Ajeti-Musa: Mirani është fëmija më i ëmbël në botë, tash ai i ka tri vjet dhe si shumë fëmijë të moshës së tij është bërë goxha i vështirë për t’u menaxhuar me sherre të shumta, por në të njejtën kohë nuk ka gjë në këtë botë që e bëj me më shumë kënaqësi se sa të kaloj kohë më të.

Bebaime: Kush vendosi që djali të quhet Miran dhe çfarë kuptimi ka ky emër?

Shkurte Ajeti-Musa: Kurrë nuk kam besuar se procesi i emërtimit do të jetë aq i gjatë dhe i vështirë. Mund t’ju garantoj që i kemi analizuar me mijëra emra. Sa më shumë analizon pastaj bëhet edhe më e vështirë. Emrin Miran gjithnjë e kemi pasë opcion të parë dhe të vetëm, me emrat tjerë vetëm se ia kemi komplikuar jetën vetës. Emri është shqip, tingëllon bukur, është i thjeshtë dhe është i mirë si Mirani.

Bebaime: Ju jeni nënë e përkushtuar që gjithmonë jeni pranë djalit tuaj. Na tregoni momentin e parë që keni kuptuar se jeni shtatzënë si jeni ndjerë?

Shkurte Ajeti-Musa: Çdo vajzë ëndërron një ditë të bëhet nënë, njësoj edhe unë. Por, gjithnjë të duket si diçka abstrakte, diçka që do të të ndodhë dikur, por asgjë nuk të pregatitë për momentin e parë që e kupton se do të bëhesh prind, të përshkon gëzimi, lumturia, por në të njejtën kohë të kalojnë njëqind e një mijë mendime nëpër kokë, mendime për të ardhmen, për të papriturat, për përgjegjësitë etj etj., megjithatë atë ndjenjën e lumturisë nuk mund të ta heq askush.

Bebaime: Si jeni ndjerë gjatë shtatzanisë, a shkuar gjithçka ashtu siç keni dëshiruar?

Shkurte Ajeti-Musa: Jam shumë e lumtur se kam pasur fatin që të jem e rrethuar me njerëz të mrekullueshëm në jetën time, pikë së pari jam shumë mirënjohëse që të këm një bashkëshort shumë përkrahës dhe shumë të durueshëm dhe që më ka qëndruar pranë për gjithçka. Jam shumë me fat që nëna dhe motra ime kanë qenë shtylla përkrahëse të jashtëzakonshme për mua gjatë gjithë procesit. Më kanë udhëzuar dhe më kanë qëndruar pranë në mënyrë që të jem e prëgatitur për çdo eventualitet. Dhe gjithçka ka shkuar si është më së miri.

Bebaime: Pa dyshim se momenti më kulmor në jetën e një nënë është kur sjellë një jetë një qenie njerëzore. Si kanë qenë ato momente kur për herë të parë e keni mbajtur djalin tuaj në dorë?

Shkurte Ajeti-Musa: Edhe tash rrënqethem kur i kujtoj ato momente. Janë vërtëtë të papërshkrueshme. Mban në duar një qenie që ke krijuar, e shikon e përqafon, pastaj e shikon, duke mos besuar se ti ke bërë mrekullinë më të bukur që mund të bëjë njeriu, ke krijuar edhe një jetë. Lumturi absolute.

Bebaime: Sa ka ndyshuar jeta juaj që nga lindja e Miranit?

Shkurte Ajeti-Musa: Kurrë disi nuk e kam marrë seriozisht kur i dëgjoja të tjerët tek thonin kur të bëhesh prind e kupton se vetja jote më nuk është prioritet, por ajo e fëmijës. Tash e kam parë se sa e vërtetë është ajo punë. Mirani më është bërë alfa dhe omega e prioriteteve të mia, dhe në çdo sekondë të çdo minuti mundohem ti jap pikë së pari dashuri, e pastaj të gjitha tjerat.

Bebaime: Fëmija i parë do më shumë kujdes, kjo për shkak se gjithmonë hera e parë është e vështirë. Kë e ke pasur afër vetes në momentet e para, pra kush u ka ndihmuar në shtëpi për djalin?

Shkurte Ajeti-Musa: Çdo fëmijë do shumë kujdes, por e veçanta e fëmijës të parë është se ballafaqohesh me befasi, me të papritura, të cilat janë të paevitueshme. Siç e thashë edhe më lartë kam qenë shumë me fat që e kam nje bashkëshort të mrekullueshëm, që më përkrahë në çdo gjë, dhe po ashtu shumë me fat që nëna dhe motra me përvojat e tyre më kanë qëndruar pranë për të më përgatitur sa më mirë që është e mundur për të gjitha që do më shoqërojnë në procesin e mrekullueshëm të amësisë.

Bebaime: Nënat janë shumë të lidhura me fëmijët, saqë bashkëndjejnë atë që e përjeton foshnja e tyre. Ju keni pasur ndonjë moment që bashkë me djalin keni qarë?

Shkurte Ajeti-Musa: Ka shumë situata të ndryshme gjatë gjithë procesit të shtatëzanisë, e mëpastaj të të qenit nënë. Secila nënë mendoj se ka lidhje specifike me femijën e saj. Është krejt e natyrshme lidhshmëria, është ndjenja më e bukur, është dashuria absolute ndaj dikujt që është pjesë e jotja dhe tash është pjesa më e rëndësishme e jetës. Kur të qan fëmija, të qan jo vetëm fytyra, por edhe zemra e shpirti, por kur të qesh, e të buzëqesh e të shikon me ata sy të mëdhenj, të kënaq loçkën e zemrës, e të bën të ndjesh lumturi absolute në thelllësi të shpirtit.

Bebaime: Sa u ka ndihmuar bashkëshorti rreth djalit?

Shkurte Ajeti-Musa: E lëvdërova përkrahjen e bashkëshorit në dy nga pyetjet tuaja paraprake, tash po e lëvdëroj edhe një herë ngase ka qenë, është dhe do të jetë ai pa të cilin nuk e di se si do t’ja dilja mbanë. Fëmija ka nevojë për dashurinë e të dy prindërve, i ka raportet e tij unike, e te veçanta me të dy prindërit, e këtu mund të them se që të dy pa asnjë dallim mundohemi të jemi prind ekzemplar për Miranin.

Bebaime: Keni menduar në të ardhmen ta zgjëroni familjen tuaj?

Shkurte Ajeti-Musa: Absolutisht.

Intervistoi: TEUTA SINANAJ