Milot Hasangjekaj, është ndër këngëtarët më të njohur të repit në Kosovë. Ai është pjesë e grupit “Etno”, me të cilin grup kanë sjellë dhjetëra hite që do të mbahen mend gjithmonë. Miloti, kësaj radhe flet në rolin e babait, familjen dhe çdo gjë tjetër.

Bebaime: Milotin të gjithë ju njohin si këngëtar i njohur, por pak dinë për familjen tënde. Në tregoni me disa fjalë për familjen tuaj

Milot Hasangjekaj: Ne jemi një familje e vogël për momentin, ku pas martesës unë dhe Marigona, përafërsisht një vit më vonë vendosem që të planifikojmë të zgjerohemi, d.m.th të kemi fëmijë. Dëshira jone na u plotësua falë Zotit dhe u bëmë me një djalë. Tani jemi tre “musketeros”. Jetojmë ne Prishtine dhe kemi diskutime dhe plane për të ardhmen për zgjerimin e shumë tjera.

Bebaime: Ju keni një djalë, sa vjeçar është dhe si e keni pagëzuar?

Milot Hasangjekaj: Djalin e kemi pagëzuar me emrin JAN dhe në shtator të këtij viti i mbush 3 vjet.

Bebaime: Na tregoni çfarë gëzimi pati në jetën tuaj kur për herë të parë u bëre baba. Si ishte ai moment?

Milot Hasangjekaj: Për momentin të bërit babë, ose sidomos atë momentin e parë të takimit e kemi diskutuar me shumë miq dhe familje, e pak a shumë kam qenë i njoftuar verbalisht për ndjenjën. Por, deri sa e kam përjetuar momentin për te cilin po flasim, unë mendoj që nuk ka fjalë që përshkruan. Personalisht dhe sinqerisht po flas jam munduar ta mund këtë ndjenje për shkak të frikës se mos po ndodh diçka e keqe në kuptim se fëmija është i sapo lindur etj. Por, është e qartë që ai moment është fillim i një kapitulli i ri, një diçka që shumë e shumë mendime të janë endur nëpër kokë për një kohe të gjatë, dhe tani je duke u përballur me të fizikisht dhe emocionalisht, e pas asaj tani fillojnë gjërat e reja!

Bebaime: Duket se jeni baba i përkushtuar. Çka ju bën që të jeni kaq shumë i dhënë pas djalit tuaj?

Milot Hasangjekaj: Përkushtimi nuk ka fund, dikush më pak e dikush më shumë, por edhe unë mundohem që të jemi diku aty te mesi i kësaj. E kam të pamundur fizikisht të jemi gjithmonë bashkë për shkak te angazhimeve të mia gjate ditës, shpesh edhe mbrëmjes, e më së keq edhe gjatë vikendeve. Andaj edhe të themi barra më shumë i bie gruas për djalin, e unë mundohem të mbush atë boshllëkun e lënë kohë pas kohe.

Bebaime: Tash kur jeni baba mund të na thoni se sa peshon kjo fjalë?

Milot Hasangjekaj: Të bërit baba mua më ka shtyrë realisht më shumë për ta kuptuar konceptin e nënës dhe vlerën e saj si psh. shtatzëninë, lindjen, statutin dhe ndjesinë e nënës, lidhjen me fëmijën e shumëçka tjera. Unë mendoj që në familje në raport me fëmijën babai ka rolin e tij, por është i pafuqishëm për te dhënë 100% kontribut në këtë raport sidomos ne vitet e para (1-2 vite).

Pastaj kjo ndryshon e kalon në përgjegjësi, sepse ka mundësi për të kontribuar në zhvillim, edukim, kreativitet etj., e që është shumë e rëndësishme!

Bebaime: Me kë është i lidhur djali më shumë, me ju apo bashkëshorten tuaj?

Milot Hasangjekaj: Më shumë është i lidhur me Marigonën, është normale sepse kalojnë më shumë kohë së bashku dhe ndoshta edhe falë teorisë që djemtë lidhen më shumë me nënat. Unë kam kontribuar pak edhe në një taktikë rreth kësaj me qëllim që të mos lidhem shumë me të për shkak që të mos shkaktoj shumë probleme kur unë duhet të dal ose nuk jam në shtëpi. E shpresoj që sa të rritet edhe pak të jemi më të lidhur.

Bebaime: Çfarë këshille keni për prindërit në Kosovë. Sipas jush, cka duhet bërë ata që një fëmijë të rritet ashtu si duhet?

Milot Hasangjekaj: Planifikimi, kuptojeni si diçka të re, mundohuni të përshtateni dhe mundohuni ti kuptoni ndryshimet dhe rrethanat, mësoni ju nga fëmijët dhe mësoni fëmijët me ju. Ndani përvojat me të tjerët dhe merrni këshilla nga te tjerët. Tri këshilla një mendim, këtë te fundit merreni vet.

Bebaime: Keni në plan në të ardhmen ta zgjeroni edhe më shumë familjen tuaj?

Milot Hasangjekaj: Po kemi plane, por pa imponime për kohën se kur duhet bërë.

Intervistoi: TEUTA SINANAJ