Delfina Krasniqin e njihni të gjithë. Sa herë e hapni programin e mëngjesit në RTK do ta shihni atë. Ajo para gjashtë muajve është bërë nënë dhe në intervistën dhënë poralit tonë, shpalos në detajet të qenit nënë dhe planet e saj që në të ardhmen ta zgjedrojë familjen.

Bebaime: Ju keni një fëmijë, djalë, të cilin e keni pagëzuar me emrin Teo. Na flisni pak se çfarë kuptimi ka ky emër dhe pse vendoset ta pagëzoni kështu?

Delfina Krasniqi: Është një kombinim, shkurtesë i emrit shumë të vjetër - Teobald, që është reflektim i një konteksti historik dhe kulturor i gjermanishtes së vjetër. Emri Teo në shumë gjuhë të botës ka kuptimin e njëjtë. Teo-dhuratë nga Zoti. Për mua dhe Artanin ka qenë shumë i rëndësishëm domethënia e emrit.

Bebaime: Në flisni pak për Teon, nga dita e parë e gjer tani?

Delfina Krasniqi: Teo personifikon më së miri kuptimin e emrit. Është vërtetë një engjëll, një dhuratë nga Zoti. Prej ditës së parë, është shumë i hareshëm, i buzëqeshur, i lumtur. Më buzëqeshjen e tij, çdo njeri e bën për vete, është shumë i dashur.

Foto: Teo

Bebaime: Na tregoni si jeni ndjer në momentin e parë që keni parë fëmijën tuaj, keni thënë dhe ju si shumë nëna “është ashtu siç e kam imagjinuar”?

Delfina Krasniqi: Mendoj se truri i njeriut, me gjithë gjenialitetin e tij, është ende i pafuqishëm me krijua një imagjinatë të tillë. Prandaj, them që ishte krejt ashtu si nuk e kisha imagjinuar, diçka përtej imagjinatës, një dashuri e paqenë, e pa përjetuar më parë, një ndjenjë e fuqishme, që nga 0 deri në 1 arrin në atë që unë e quaj “Baby-Nirvana”, ku ti përjeton kulminacionin e kënaqësisë dhe qetësisë shpirtërore.

Bebaime: Çfarë ndjesi ka qenë kontakti i parë me të, si mund të na përshkruani ato çaste?

Delfina Krasniqi: E kam puthur në faqet e trasha, bullafiqe, shumë të buta, të ndjeshme, një aromë që ende e kam në maje të hundës. Derisa, Teo mezi mbante sytë hapur, duke u munduar ta kuptoj botën e re. Është një ndjenjë shumë bukur, diçka që shpresoj t’i ndodh çdo njeriu.

Bebaime: Sa ju ndihmon bashkëshorti rreth fëmijës?

Delfina Krasniqi: Artani është shumë i përkushtuar. Ka imagjinatën shumë të zhvilluar dhe që nga dita e parë i tregon përralla, rrëfime me të cilat Teo kënaqet dhe qesh shumë. Përralla më e pëlqyer nga Teo është ajo që Artani ia tregon me veturën Herbie, i frymëzuar nga filmi “The Love Bug”. Por, matësi më i mirë i përkushtimit të Artanit shihet në fytyrën dhe reagimin e Teo’s. Sa herë që e dëgjon zërin, apo e shikon Artanin, Teo gjithmonë qesh dhe ndjehet shumë i lumtur. Dhe gjithmonë kureshtar për rrëfimet, përshkrimin fantastik të përrallave të babit.

Foto: Artani me Teon

Bebaime: Si mund të na përshkruani momentet e ardhjes së fëmijës tuaj në shtëpi. Jeni frikësuar se mos nuk do t’ia dilni, kush ju ka ndihmuar në ditët e para?

Delfina Krasniqi: Është sfidë shumë e madhe, shumë gjëra të shkojnë në mendje. Por, përqendrimi maksimal te fëmija i porsalindur ka dy efekte pozitive. Nën një, lë pak hapësirë për të gabuar, së dyti është mekanizëm i mirë për t’u rikooperuar shumë shpejt nëna. Në fakt, nënat nuk mendojnë fare për vete, por vetëm për fëmijën. Është një proces i natyrshëm, ku gabimet shndërrohen në leksion, ku frika përkthehet në kujdes, ku mbi gjitha përkushtimi shkrihet në dashuri, në bekim.

Bebaime: Çka kryesisht i jepni për të ngrënë Teos. Keni ndonjë recetë apo gatim të veçantë që i gatuani djalit tuaj dhe mund atë ta ndani me ne, me qëllim që ndonjë nënës së re mund ti hyjë në punë?

Delfina Krasniqi: Teo i ka gjashtë muaj, ende pinë një kombinim të qumështit të gjirit dhe qumësht shtesë. Ai tash e dy muaj, kam filluar edhe ta ushqej me pemë dhe perime të ndryshme. Tash për tash kombinimi Mango/Banane i pëlqen më së shumti, por shija ndryshon kohë-pas-kohe.

Foto: Delfina Krasniqi

Bebaime: Nënat janë të lidhur emocionalisht me fëmijët e tyre. Ju ka ndodhur ndonjëherë që edhe ju të qani bashkë me djalin tuaj, në ndonjë rast të caktuar?

Delfina Krasniqi: Po, kur Teo ka marr vaksinën e parë, unë respektova këshillën e mjekut, që mos t’i jap asnjë medikament për qetësimin e dhimbjeve. Kur është zgjuar nga gjumi, ka filluar qajë, duke me shikuar në sy, sikur kërkonte ndihmë nga unë. Aty kam filluar të qajë edhe unë. Por, situata të tilla, të lidhin edhe më shumë me fëmijën dhe në fund është një përjetim sa i natyrshëm aq edhe i bukur.

Foto: Delfina me Teon

Bebaime: Çka do t’ju sugjeroje nënave të reja, apo edhe atye që janë në prag të lindjes?

Delfina Krasniqi: Sugjerimi im është i thjeshtë. Mendoj se çdo nënë është mirë të përjetoj të gjitha ato që nënat tona i kanë përjetuar. Duhet të jetë diçka e pamenduar më herët, e paplanifikuar, diçka e natyrshme. Diçka që e mëson orë pas orë, minutë pas minute. Megjithatë, kam disa sugjerime, të cilat mua më kanë bërë mirë. Së pari nënat nuk duhet t’i kap paniku, gjithçka do të shkoj natyrshëm. Së dyti, kur lind fëmijë, sa më pak mysafirë, të paktën tre muajt e parë, shumë qetësi, mbështetje të pakufizuar nga burri dhe të tjerët. Mbi gjitha ta shijojnë çdo ditë me fëmijën.

Bebaime: Keni menduar në të ardhmen ta zgjeroni familjen edhe me ndonjë fëmijë tjetër?

Delfina Krasniqi: Tash për tash, Teo e ka pushtuar botën time dhe të Artanit. Jemi shumë të përmbushur, jemi shumë të lumtur. Besoj se çdokush dëshiron që këtë përmbushje, këtë lumturi, ta dyfishojë-trefishoj.

Intervistoi: TEUTA SINANAJ