Hekuran Krasniqi njihet si këngëtar i baladave. Ai deri tash ka bërë disa këngën që kanë bërë bujë dhe po ashtu ka bërë këngë edhe për këngëtarë të tjerë. Këtë radhë ai për herë të parë flet për familjen e tij të ngushtë. Në këtë intereviste mund të mësoni se me kë është i martuar Hekurani, sa fëmijë ka, a ka në plan që ta zgjerojë familjen në të ardhmen dhe shumë gjëra të tjera që nuk i keni ditur për këtë këngëtar.
Bebaime: Hekuran të gjithë ju njohin si këngëta i njohur, por pak dinë për familjen tënde. Në tregoni me disa fjalë për familjen tuaj?
Hekuran Krasniqi: Para se gjithash duke e ndarë këtë intervistë me ju për herë të parë flas për familjen time të ngushtë. Nuk kam dashur që të përziej familjen me artin, në këtë rast meqë kërkohet që në mënyrë të veçantë të intervistohem në cilësinë e prindit do të përpiqem të bashkëbisedojmë . Familja ime e ngushtë është tre anëtarëshe, bashkëshortja, vajza dhe unë jetojmë në një sipërfaqe 100 metra katror dhe jemi shumë të lumtur si familje.
Bebaime: Sa vjeçe është vajza dhe si quhet?
Hekuran Krasniqi: Kam një vajzë është katër vjeçare dhe quhet Tiara. Ajo na mbush shtëpinë plotë gëzime.
Bebaime: Na tregoni çfarë gëzimi pati në jetën tuaj kur për herë të parë u bëre baba. Si ishte ai moment?
Hekuran Krasniqi: Sigurisht se emocionet ishin të përziera, u ndjeva shumë mirë dhe prej momentit kur Tiara erdhi në jetë gjithçka është ndryshuar për të mirë, sepse tani mendoj si prind.
Bebaime: Duket se jeni baba i përkushtuar. Çka ju bën që të jeni kaq shumë i dhënë pas vajzës tuaj?
Hekuran Krasniqi: Konsideroj se obligim i prindit është të jap maksimumin për fëmijën e vet. Këtu përfshihen të gjitha detyrimet si ato fizike, përfshirë edhe ato shpirterore, të cilat në perspektivë reflektojnë te fëmija, i cili do të rris imunitetin e vet dhe më lehtë do të ballafaqohet me sfidat që sjellë jeta.
Bebaime: Me kë është i lidhur vajza më shumë, me ju apo bashkëshorten tuaj?
Hekuran Krasniqi: Thuaja se me të dytë, por meqë rri më shumë me nënën, ajo i mungon më shumë kur nuk është pranë saj, por edhe unë kur largohem me punë dhe kur kthehem, sapo takoi Tiarën e vëreje se mbushet plotë jetë kur më hidhet në qafë dhe më përqafon fortë.
Bebaime: Sa i ndihmoni bashkëshortes rreth vajzës?
Hekuran Krasniqi: I ndihmoj vazhdimisht aq sa mundem dhe di. Zakonisht në mëngjes vajzës i shërbej një lugë mjaltë dhe herë pas here ushqehemi bashkë në tryezën e bukës, në të kundërën bashkëshortja ime merret më shumë me përgatitjen e ushqimit dhe kujdeset vazhdimisht për menynë e Tiarës.
Bebaime: Cili është mesazhi juaj për prindërit e Kosovës. Si duhet ata ti ushqejnë, edukojnë fëmijët e tyre?
Hekuran Krasniqi: Prindërit mendoj se duhet të ofrojnë më të mirën për fëmijët e tyre, kuptohet sipas mundësive, por ajo që e kemi të gjithë dhe nuk blihet me para është edukata, kultura dhe kënaqësia shpirtërore që e pasuron fëmijën dhe e bën të denjë për jetë.
Bebaime: Keni në plan në të ardhmen ta zgjeroni edhe më shumë familjen tuaj?
Hekuran Krasniqi: Në emër të Zotit po. Tiarën nuk mendojmë ta lëmë vetëm, ajo e do një motër dhe një vëlla, e për këtë nuk vendosim ne, vendos i madhi Zot.
Intervistoi: TEUTA SINANAJ